القميص الأخضر

امبارح بالليل تخيلت إني بتكلم معاك في التليفون والبيت كله نايم .. كان إحساس جميل..

فضلنا نتكلم ونضحك ونحكي عن يومنا.. وقعدت تقوللي نكت بايخة وأنا كنت هاموت من الضحك .. اصلي ما كنتش بحاول أفسر النكت.. ما أنت كده كده دمك خفيف على قلبي ..

وبعدين قعدت تحكيلي حكاية الشاطر حسن .. وبما أنى حافظاها عن ظهر قلب قررت أنام وأنت بتحكيهالي .. مش علشان حاجة غير أنى كنت عايزة أشاركك أحلامي .. ما كنتش عايزة يكون فيه جزء غامض في حياتي أو حاجة نفسك تعرفها عنى ..

نمت وكملت معاك الحكاية.. كانت مختلفة جدا.. كانت حدوتة بكل الألوان اللي بحبها..

وصحيت الصبح مبتسمة بس متأخرة كالعادة .. قمت جرى فتحت الدولاب و سحبت قميص اخضر بحبه.. ما أنت عارف أنى بحب اللون الأخضر..

ونزلت في طريقي اليومي وأنا بغنى "عصفور طل من الشباك وقاللى يا نونو" ..

وصلت الشغل وصبحت على كل اللي شفته في طريقي .. رئيستي، زملائي، وعم صالح بتاع السندوتشات اللي رد عليا بجملة .. "صباحك زي الفل يا فندم" ..

وقعدت اشتغل والابتسامة لسه مصره علي وضعها..

رن جرس تليفون مكتبي .. كانت واحدة صاحبتي .. لقيتها بتقوللي "شفتك الصبح و انتي نازله وكنت عايزة اصبح عليكي بس كان شكلك مستعجل أوي .. كنت عايزة أقولك أن لبسك شيك جداً.. اللون الأسود يجنن عليكي "..!!

استأذنت منها فورا من غير "ميرسى على ذوقك" بحجة أن عندي اجتماع مهم .. وجريت على الحمام علشان أشوف نفسي في المرايه ....

معقول؟؟

أنا مكنتش لابسة أسود .. فين قميصي الأخضر؟؟

وقبل أن أجد إجابة على سؤالي .. أفقت على صوت أمي تناديني قائلة
" المنبه بقالوا ساعة بيرن .. اتأخرتي"!! ..